26 जनवरी -- भाषण

 इण ज्ञान रे मिंदर रा पुजारी आदरजोग म्हारा व्हाला हेड माटसाब, म्हाने ज्ञान रो मारग बतावण वाळा माटसाब,अर मंच माथे बिराजियोडा घण मुंगा पावणा, गांव रा अणमोल निपजियोडा रतना जिसा म्हारा बडेरा, मोटयारा, गांव रे हर घर री स्यान म्हारी मातावा, बहना अर फुला ज्यूँ सुगंध देवंता , मूळकता म्हारी पाठशाला रा सगळा पढ़ेसरिया आप सगळा ने म्हारो निवण !
 आप सगळा ने जाणकारी में ह के आज रो दिन आपणे देश सारू कितो महताऊ ह आज आपणे देश रे सगळा नर नारियां सारू उछब रो दिन ह आज आपा सगळा इण महताऊ बेळा अठे भेळा हुया हा
आज रे ही दिन 26 जनवरी 1950 ने आपणे देश रो संविधान लागू हुयो हो, 26 जनवरी 1950 ने आपणो देश भारत प्रजातांत्रिक गण तंत्र बण्यो, गणतंत्र रो अरथ हुवे क जनता सारू जनता रो राज

इण स्यु पेला री बात करा तो आपाने याद राखणो चाइजै के आपणो देश विदेशी ताकता री  गुलामी री सांकळा स्यु जकडियोड़ो हो !
आपणे देश रा महान लोगा जीणा में सुभाषचन्द्र बोस,भगतसिंह,राजगुरु,चन्द्रशेखर आजाद, लाल-बाल-पाल, महात्मा गांधी , भीमराव अंबेडकर आद आपरो सों कीं निछावर करयो जणा आपाने आजादी मिली
आजादी रे बाद देश ने आछी तरया चलावण सारू कीं नैम कायदा अर एक सांवठे ढांचे री जरूरत ही अर बो ढांचों ही आपणो संविधान गिणीजै!
आपणे संविधान ने बणण में 2 साल 11 महीना अर 18 दिन रो बगत लाग्यो , आपणो संविधान दुनिया रो सगळा स्यु लांठो अर लिखित संविधान गिणीजै
इण संविधान में आपणे देश रे हर धरम ,समाज, मिनख,लुगाई ,टाबर, ने पालण-पोषण, फळन-फूळन,अर उन्नति सारू कीं नेम कायदा बणाइज्या ह
सगळा रे विकास में ही आपणे देश रो विकास ह 


आओ आपा सगळा इण पावन बेळा ओ परण लेवा क
(1) आपा संविधान में दियोड़ा अधिकारा सारू हका सारू हमेशा जागरूक रेवाला
(2) अधिकारा रे सागे सागे संविधान में दियोड़ा कर्तव्या री पालना कराला!
(3)आपणे मान सम्मान , भाषा ,संस्कृति री रिछया सारू पुरजोर प्रयास(खेचळ)कराला
(4)इस्यो कोई काम नी कराला जिको नीति रे विरुद्ध हुवे!
(5)देश री अबखाई , तरक्की सारू हमेशा त्यार रेवाला!
छेवट में  आप सगळा रो मोकळो आभार क आप म्हारी बात ने ध्यान स्यु सुणी
जै हिन्द
सगळा सु हाथ जोड़ विनती ह के इण राजस्थानी भाषा में लिख्योडे भाषण ने 26 जनवरी ने हर स्कूल में बोलावो अर आपणी भाषा रे लोगा ने चेतावो
इणने आगे स्यु आगे (शेयर) करो सा
गुर्जर इतिहास व मारवाड़ी कविता के लिए ब्लॉग  पढे  :-https://gurjarithas.blogspot.com

सम्पूर्ण कथा जानने के लिएं इस ब्लॉग को FOLLOW जरूर करे...